España interveu máis de 69 toneladas de drogas en abordaxes a embarcacións en augas internacionais durante 2020

  • É a maior cifra de substancias estupefacientes comisadas dende 2011 e triplica a cantidade de 2019, segundo o informe elaborado polo Centro de Intelixencia contra o Terrorismo e o Crime Organizado (CITCO) do Ministerio do Interior
  • O Servizo de Vixilancia Aduaneira da Axencia Tributaria, Policía Nacional e Garda Civil levaron a cabo dezaoito operacións en alto mar, once delas con resultado positivo
  • Dende 2011 ata 2020, Vixilancia Aduaneira e as Forzas e Corpos de Seguridade do Estado realizaron 129 abordaxes en augas internacionais que permitiron a incautación de 386 toneladas de drogas

5 de xuño de 2021.-Vixilancia Aduaneira da Axencia Tributaria e Las Fuerzas e Corpos de Seguridade do Estado interviñeron durante 2020 máis de 69 toneladas de substancias estupefacientes en 18 abordaxes a embarcacións en augas internacionais, en concreto nas zonas do Atlántico Norte e do Mediterráneo. En total aprehendéronse 63,6 toneladas de hachix e 5,4 toneladas de cocaína.

Constitúe a maior cantidade de droga comisada neste tipo de operacións dende 2011 e triplica a intervida ao longo do ano 2019. No cómputo global, dende 2011 ata 2020, Vixilancia Aduaneira da Axencia Tributaria, dependente do Ministerio de Facenda e as Forzas e Corpos de Seguridade do Estado, realizaron 129 abordaxes en augas internacionais que permitiron a incautación de 386 toneladas de drogas.

Os datos forman parte do balance do ano 2020 elaborado polo Centro de Intelixencia contra o Terrorismo e o Crime Organizado (CITCO) do Ministerio do Interior sobre abordaxes en augas internacionais. Estas operacións están contempladas nas convencións de Nacións Unidas sobre o Dereito do Mar, de 1982, e contra o Tráfico Ilícito de Estupefacientes e Substancias Psicotrópicas, de 1988, ambas as dúas ratificadas por España.

En 2020, España tramitou 27 solicitudes de abordaxe, das cales se realizaron 18, once con resultado positivo e sete sen detección de substancias prohibidas. Outras nove peticións non culminaron en alto mar por distintas causas.

A lexislación internacional obriga a requirir autorización para as abordaxes aos países baixo cuxo pavillón navegan as embarcacións intervidas. Das investigadas, na súa maioría veleiros, oito navegaban baixo pavillón de Países Baixos. Séguenlle por número Reino Unido, Alemaña e Bélxica, con tres embarcacións en cada caso, e Togo e Panamá, con dous cada unha.

Filmación do operativo (para descargar o vídeo débese introducir a seguinte dirección web):

https://we.tl/t-p11ceDGgY1

  • RSS
  • Mapa web
  • Accesibilidade
  • Axuda