A Axencia Tributaria advirte de intentos de fraude a través de Internet

Os diversos intentos de engano fan referencia a supostos reembolsos de impostos, mediante envíos de comunicacións masivas por correo electrónico nos que se suplanta a identidade e imaxe da Axencia Estatal de Administración Tributaria, ou ben a identidade dos seus directivos. Con frecuencia, os intentos de fraude fan referencia a unha suposta información que imposibilita o envío da devolución da campaña de Renda e suplanta a imaxe da Axencia Tributaria.

Nestes envíos de correos fraudulentos, coñecidos como "phishing", faise referencia a un reembolso de impostos inexistente na que o receptor do correo electrónico sae beneficiado. Para poder dispoñer do diñeiro hai que acceder a un enderezo web no que se deben achegar datos de contas bancarias e tarxetas de crédito.

Estas fraudes son detectadas en moitas ocasións grazas á colaboración dos internautas que se poñen en contacto cos servizos de información da Axencia Tributaria, que toma inmediatamente as medidas necesarias para perseguilos.

A Axencia Tributaria recorda que a mellor medida é a prevención dos usuarios ante comunicacións sospeitosas que inclúan a petición de datos bancarios e agradece a presta colaboración para informar deste tipo de fraudes.

Por último, a Axencia Tributaria volve insistir en que:

• nunca solicita por correo electrónico información confidencial, económica ou persoal, nin números de conta nin números de tarxeta dos contribuíntes.
• nunca paga devolucións con cargo a tarxetas de crédito.
• nunca cobra importe ningún polos servizos que presta.

Os dominios reais da Axencia Tributaria son: www.aeat.es, www.agenciatributaria.es e www.agenciatributaria.com. O acceso á sede electrónica debe facerse a través dos dominios: www.agenciatributaria.gob.es, www1.agenciatributaria.gob.es, www2.agenciatributaria.gob.es, www1.aeat.es, www2.aeat.es, www3.aeat.es, www4.aeat.es, www5.aeat.es e aeat.es.

En caso de dúbida, sobre a autenticidade de calquera correo electrónico ou sitio de Internet que afirme estar remitida ou ser propiedade da Axencia Tributaria, contacte connosco no Centro de Atención Telefónica del Departamento de Informática Tributaria (901 200 347) para verificar a súa autenticidade.

Por outra parte, a Axencia Tributaria prohibe expresamente a realización de "framings" ou a utilización por parte de terceiros de calquera outros mecanismos que alteren o deseño, configuración orixinal ou contidos en calquera dos dominios descritos neste Aviso de seguridade.