Os diversos intentos de engano fan referencia a supostos reembolsos de impostos, mediante envíos de comunicacións masivas por correo electrónico nos que se suplanta a identidade e imaxe da Axencia Estatal de Administración Tributaria, ou ben a identidade dos seus directivos. Con frecuencia, os intentos de fraude fan referencia a unha suposta información que imposibilita o envío da devolución da campaña de Renda e suplanta a imaxe da Axencia Tributaria.

A partir do 19 de abril e ata o 29 de xuño os contribuíntes que o desexen poderán solicitar cita previa para modificar o seu borrador de renda 2011 ou para confeccionar a súa declaración. É conveniente que os contribuíntes acudan ao lugar da cita coa documentación que de modo orientativo se sinala a continuación.

Ante as dificultades de acceso á sede electrónica provocadas pola forte demanda dos servizos de asistencia postos a disposición dos cidadáns na Campaña de Renda 2011, aprobouse a Orde HAP/725/2012, do 12 de abril, pola que se modifica a Orde EHA/1658/2009, do 12 de xuño.

Publicouse un novo portal que ofrece toda a información sobre Censos, NIF e domicilio fiscal antes publicada en diversas alíneas da páxina. O portal mostra de xeito ordenado os aspectos informativos e os accesos á tramitación e ás consultas situadas na Sede electrónica, cun tratamento específico segundo segmentos de usuarios: Cidadáns e Empresas e profesionais.

A Axencia Tributaria realiza unha proba piloto en Cataluña, Canarias e Asturias para responder por Internet ás dúbidas tributarias.

A Disposición adicional trixésima quinta da Lei do IRPF, engadida polo Real Decreto-lei 20/2011, do 30 de decembro (BOE do 31), de medidas urxentes en materia orzamentaria, tributaria e financeira para a corrección do déficit público, establece un gravame complementario á cota íntegra estatal no Imposto sobre a Renda das Persoas Físicas que resulta de aplicación nos períodos impositivos 2012 e 2013. En consonancia con iso, o citado Real Decreto-lei establece así mesmo un incremento das retencións e ingresos a conta sobre os rendementos do traballo que se cuantifica mediante a aplicación dunha escala especificamente aprobada para tal efecto.

Encóntrase dispoñible o programa de axuda de retencións do traballo persoal para o exercicio 2012. Ademais, como novidade para este exercicio, está dispoñible un novo servizo on line para o cálculo de retencións que non requirirá descarga do programa de axuda no equipo do usuario. Con estes instrumentos o contribuínte poderá calcular a contía e o tipo de retención que lle correspondan en función das retribucións aboadas ou satisfeitas, conforme se establece no Regulamento do Imposto sobre a renda das persoas físicas nos seus artigos 80 e seguintes.

O simulador confeccionado pola Axencia Tributaria facilita a realización dos cálculos e permite simular o resultado da declaración do Imposto sobre a renda das persoas físicas referida ao exercicio fiscal 2011, a presentar en 2012. Este servizo de axuda calcula o resultado da hipotética declaración, que non ten validez xurídica, en función dos datos introducidos polo propio contribuínte. É un instrumento de utilidade para quen queira planificar ou coñecer con antelación cal podería ser a cota a ingresar ou a devolver na súa futura declaración do Imposto sobre a renda das persoas físicas. Os resultados non son vinculantes para a Axencia Tributaria.

Dende que visualice en sede electrónica ou reciba por correo a notificación de inclusión no sistema de notificación electrónica obrigatoria, todas as súas notificacións seranlle remitidas exclusivamente, sen máis trámite, ao seu Enderezo Electrónico Habilitado.

A Axencia Tributaria está procedendo á actualización do censo de colaboradores sociais para a presentación telemática de declaracións en nome de terceiros. Para que un profesional do ámbito tributario actúe como colaborador social é condición imprescindible ser membro dunha asociación ou colexio profesional que teña subscrito o correspondente convenio coa Axencia Tributaria.